Se n’aone ascort che da n trat en ca
zeche te noscia parlèda l’é sutà?
No se la sent prest più la SC
e a sie post l’é dut n SS SS SS.
Soraldut ti joegn chest se l’à notà,
anter la bezes l’é doventà normalità.
Te paìsc se sent ciacolèr
che te noscia val l’é dut demò n lurèr,
che se n luron na schena e che la vita la passa via endèna.
“Èste sentù ansera coche l tonèa e l sdravarìa?
Da la sperduda me é magnà n strudel con na spudèda de brama soravìa”.
Ma co fajone a rejonèr coscì?
Nosc tipich son SC olà él fenì?
Per no parlèr de la J ladina
che l’aon beleche duc sconeta te vedrina!
J e Ś, S, SC e SĆ
no se sent più la desferenza anter duc chisc sibilanc,
duc a zeche vida disc la sia,
ma che chest sie dalbon ladin no l cherdarède mia!
Scutà coche rejona la jent aldidanché:
“Son jit stroz con n scienziat pelous desche na sciumia e dò son jit emprescia a cèsa”;
se l sent bendeché.
“Cèså”, “fos” e “grassa” dijon,
ma “cescio”, “fosc” e “grascia” entenon.
La bezes soraldut les se dèsc jù e les de dèsc da fèr:
“Preferesce no dir più SC per no risćèr de spudèr,
ence percheche coscita a na scema me sà de someèr,
ma gé cogne soraldut pissèr de me troèr zachei da maridèr!”
Bezes, con chesta SS nience Sènt Antone da la ciampanèles pel ve didèr
e la femenes jà maridèdes no les se sparagna,
les sention se lamentèr desche de na magagna:
“Mie fi te let l seghita a piscèr!”
E duc en prescia i complimenc jon a ge fèr,
a aer n fi tant studious e pien de fondament...
l te farà segur content!
Perché aer n fi che peissa n muie l’é na gran fortuna,
l farà l scienziat e l ruarà su la luna!
Debon che nesc veies no i é belebon sorc,
che con noscia strambarìes resuscitassa ence i morc!
Duta chesta S S S no pel restèr,
la oreies fèsc engolicèr.
Averjé la bocia maladecia e i dents moscià,
coi sibilanc giusć l’é più de calità.
La giusta pronunzia ge vel, scì,
e coscita se capion ence duc più sorì.
Cognoscer coche l’é nosc lengaz l’é bel,
donca miec l rejonèr ben.
Mie bel ladin no te n jir
vardon de no te lascèr morir,
de dut chel che ti es no volon se desmentièr
e i sons delvers tacaron endò a pronunzièr,
percheche no conta nia voler fèr i “chic”
se dò chi che ne scouta i vegn fiegoi e “sick”.
E a vo che scutède chest rap da mac,
no abià poura de durèr i sibilanc,
percheche l’é ence coscì che l ladin più bel se fèsc
e i joegn con nosc lengaz farà pèsc.
E a vo che scutède chest rap da mac,
no abià poura de cognoscer e amèr,
percheche l’é ence coscì che dut cant più bel se fèsc
e cultura e joegn zacan farà endò pèsc.