Ah chesta la é [ciapada] da n veie ta Penia amò canche jie dò la luce. Dapò g’é dat dotrei lire che al me la scrive jù e dapodò me la é emparada e tegnuda a ment e, e l’é semper amò chela. Chesta i la fajea su la Val de Sora: i jìa fora per le stue da Carnascial a la dir sù.  Dapò canche i jìa te majon, al veie jìa ite dant e sta Madalena l l’aea tacada te na corda parché no la volea che i la mene demez a maridèr! E  dapò l ge dajea i struves, l la tiraa ite, i aea magari dìesc-doudesc metri de corda, che i era jà te stua che i tiraa che la era amò fora per portech o ju per sćiala.  Cheste [mascre] chiò le era bele soule, l’era chisc doi, Janàgnol e sta pera Madalena che l la menaa stroz a maridèr. Po, la baschìa l più gran cunst l’era de inventar coche i fasc a menar al Re, se chiamaa l Re de Sobena. Gio me recorde na uta, se à maridà cajù doi, l’era Checho Monech cavìa con doi vedìe, doi burc picui vedìe, e dapò aane ciavà fora na bora e, e te sta bora aane metù ite chesc Re. No me recorde più chi che l’era che fajea l Re. E dapò aon tacà ite doi ciadene, n bèch e, e con chisc vedìe i l’à tirà a strozegon fin vindant al “Rosa”, ja Poza, che l’era ló che l’é l “Trento” ades. Dapò aló, canche l’é stat che i é rué, aane tirà na sief che no i posse passar e, e i é jic via de doi coi conesc e la maza e i à sfenet sta bora e, e l’é vegnù fora l Re! Dapò l’é jit sù e, e l’à comenzà a ge dir. Gio no me la recorde a ment, ma l scomenzaa… (ma no la é par fascian): «Già da immemorabili tempi mi fu emanato le mie più sovrani legi per tutto il mio vasto impero cavalorum»… ciavai da Poza, o musciac via a Pera… E l’Arlechin l’era, ei ei. Dapò chel l corea inant e endò e, dapò i chejea n gran ravales, un di maores che l’era, dapò canche chest Re l’aea firmà con na piuma de zedron, na gran piuma, dapò l’aea firmà chest passaport, che i la lasciaa pa sin jir. Dapò i metea chest ravales sun chist pìcol teatro, dapò vegnìa cà chest Bufon, l fajea n saut, l sutaa col cul su chest ravales e, cot, e l sprizenaa dut intorn. Chela l’era la più bela asenada che [i fajea]… Ei.