Canche più tart l Zerilo l me à encombenzà de meter jù n campionare de piante de noscia flora da stilisar per la Scola e ence per ilustrar en gran i elemenc del cors de architetura, giö è cognù tor fora ju dal Vito n bon pöch de sföes da desegn. Ma per i retrac dei velges e de le velge podeve dorar carta da pach, e chela me la toleve fora a mie spese ja la coprativa. I retrac i dojeva servir per l cors de fegura dal vero, che dapò no l’é più stat scomenzà.
L prim che è tot jù l é stat l Meneghin Manecia de 96 egn. Subit dò è tot jù la velgia Nuc. Morta chela, l più velge de Moena l’era un da Someda. Me è ciapà su la carta da pach e su sa Someda. Ma ge à mencià pöch che no le brancasse.
La Orsolina fiegola la é stata più morbia con me, e coscita ence l velge Zoprian, l Cioi del Smit, l Nicolò Felizon, l Stefen Tea, l Luigiol de Penìa, la Rachele del Viloto Mutol, l Borcan del Giochin e la Orsolina Cica.
Dapò son jit jal Forn a tor jù la Polenia dei ciaodami, e la Lìvele, tal Masc l Francescol Pontera e so femena, la Irene dei Molineri, sun Penia l Stefen e na so fiöla, l Jan e so femena, sa Poza Paol de Patech, ta Sorèga na femena e sove fiöle, ja Pardac  l Laia Brunet e l Janet Coronzin, sa noi l Mario del Janolin, miscionare tel Brajile. Come che la é jita dapò i lo sa duc co la scola de art. Ma chest che ve è contà no che nol saveade e chel che ve die ades amò de manco. Dal ‘47 en ca è fat mìngol de strada ence tel retrat. Chigiò canche i vegn a se far tor jù, enveze che me le molar i paia. Però no i se contenta de carta da pach: i völ tàula o tela. Chi da Moena fac stiegn su la carta da pach i conserve semper te mio studie a Genova.
Sessaben che col passar dei egn (catordesc per la precijion) la carta da pach la deventa śala. E na sera l’an passà, no me sautelo mo tel ciau de viventar n pöch chele fegure da Moena, ma enveze che encolorir i musc, ge è metù entorn n sfon de bianch.
Rua doi professoresse de l’Academia da Genova, e a veder sti cadres le me domana: «Come fa Lei a ottenere la bella  tinta di quelle facce?» «È un mio segreto», ge è responù.
Per voiautres enveze l’é la carta da pach.

Canche più tart l Zerilo l me à encombenzà de meter jù n campionare de piante de noscia flora da stilisar per la Scola e ence per ilustrar en gran i elemenc del cors de architetura, giö è cognù tor fora ju dal Vito n bon pöch de sföes da desegn. Ma per i retrac dei velges e de le velge podeve dorar carta da pach, e chela me la toleve fora a mie spese ja la coprativa. I retrac i dojeva servir per l cors de fegura dal vero, che dapò no l’é più stat scomenzà.
L prim che è tot jù l é stat l Meneghin Manecia de 96 egn. Subit dò è tot jù la velgia Nuc. Morta chela, l più velge de Moena l’era un da Someda. Me è ciapà su la carta da pach e su sa Someda. Ma ge à mencià pöch che no le brancasse.
La Orsolina fiegola la é stata più morbia con me, e coscita ence l velge Zoprian, l Cioi del Smit, l Nicolò Felizon, l Stefen Tea, l Luigiol de Penìa, la Rachele del Viloto Mutol, l Borcan del Giochin e la Orsolina Cica.
Dapò son jit jal Forn a tor jù la Polenia dei ciaodami, e la Lìvele, tal Masc l Francescol Pontera e so femena, la Irene dei Molineri, sun Penia l Stefen e na so fiöla, l Jan e so femena, sa Poza Paol de Patech, ta Sorèga na femena e sove fiöle, ja Pardac  l Laia Brunet e l Janet Coronzin, sa noi l Mario del Janolin, miscionare tel Brajile. Come che la é jita dapò i lo sa duc co la scola de art. Ma chest che ve è contà no che nol saveade e chel che ve die ades amò de manco. Dal ‘47 en ca è fat mìngol de strada ence tel retrat. Chigiò canche i vegn a se far tor jù, enveze che me le molar i paia. Però no i se contenta de carta da pach: i völ tàula o tela. Chi da Moena fac stiegn su la carta da pach i conserve semper te mio studie a Genova.
Sessaben che col passar dei egn (catordesc per la precijion) la carta da pach la deventa śala. E na sera l’an passà, no me sautelo mo tel ciau de viventar n pöch chele fegure da Moena, ma enveze che encolorir i musc, ge è metù entorn n sfon de bianch.
Rua doi professoresse de l’Academia da Genova, e a veder sti cadres le me domana: «Come fa Lei a ottenere la bella  tinta di quelle facce?» «È un mio segreto», ge è responù.
Per voiautres enveze l’é la carta da pach.