L’era un che menaa la pegna. No sé se la é suzeduda sa Poza, me par, chesta chiò. I metea ite la brama te chest afare de legn, i la menaa ensoma fin che vegnìa smauz. E una de cheste che i dijea che la fajea strionamenc, no? La disc: “Ge augure che no ge vegne la pegna a chela aló”, che i aea na ira per zeche, gio no sé… E chest mai più ge vegn la pegna, e mena e mena… e sta brama la vegnìa semper più lujia e mai no la vegnìa. E l ge à pensà sù, ma l disc: “L’é ruà chela una chiò”, l disc “te stua, ma ves’ veder che la me à fat n faturec!”. Ensoma l disc: “Ge sbare ite te chela pegna!”. L’à ciapà n revolver e l’à tirà te la pegna. E i contava che tel medemo temp chesta una a so ciasa la é morta. Canche chest om l’à sbarà te la pegna, chesta a ciasa soa la é morta. Ma gio, i dijea aló ta Ciasa rota che l’era zeche “ritrovo”, scheche i dijea, che se binaa le strie, che le vegnìa jù de Vael, i dijea no?, che cò i vegnìa da Sin Jan jù, perché chisc egn i cognea jir sa Sin Jan a le funzion, chisc da Soraga, che i vedea semper lum e che i sentìa, i sentìa sonar e ciantar e dapò i vedea fum e… Ciasa rota l’é sche sul confin tra Vich e Soraga, tinsom i pré, apena passà l rif, chel rif che vegn jù che dapò cajù l’é l Pont da le Laste.  E su sai pré, sal bosch, sal bosch aló, apena passà ite i ge disc Ciasa rota. Se veit ancora zeche velge sedim, zeche mures velges. I dijea che l’era la ciasa de le strie. Dapò i dijea che canche sonaa l’Aimaria no se vedea [più nia], l’era dut fenì. Cò vegnìa sonà l’Aimaria le sćiampaa sun Vael i dijea. I dijea che l’era le strie che balava. Intervista Cesare Poppi, Soraga, 5 ottobre 1976 (SCRCD 025, Soraga 1)