1.
Tosac saer cognede
che sti egn velges antiches
amò canche i copava
i pùlejes coi piches
stajeva ja le Nòtole
na burta burta velgia
col ciau còme na selgia
e l cul còme na bot.
La cianta duta sbrèndole
sbujada da le slanfie
i stinfes a sgarétole
che pareva doi cotanfies
de dì de laor i zòcoi
de festa le pianele
e fat sù da garnele
en burt gramial dut rot.
2.
L'aea na burta ciasa
de caìnt da la Roìsc
e aló la la sticava
con erbe e con raìsc.
L'aeva n schiap grandiscimo
de ciaure e de gialine
e anter ste regine
sta' còme n re n porcel.
3.
Sto re l'é da Moena
e l'é n gran bel porcel
e tacà int te la coa
l'à n tòch de campanel.
Porcel va per el mondo
reclam fage a Moena
e tova coa mena
sona chel campanel!