Anticamenter chiò te Poza la gejia de Sèn Nicolò la era forinsom al paìsc, e laìte per Spena, ite per Val dal Giàer, te Vidor l’era dute le ciase, che le era dute ló ite le ciase de chisc bachegn. Auter che te Vidor, l’era na meseria perché l’era ogni auter an n tórmen che d’istà, canche i seaa l ge portaa demez al fen e, e d’invern l ge portaa demez i cuerc e...  Na uta l’era un veie che al seaa, e l ge à dit: «Peta peta, l disc, che se me vegn al tórmen...» e  l se à tout dò n podarel (podarel fossa na brìtola storta che i aea chi egn, semper ju par stival, chiò ite). E te chela, canche l’é vegnù chest tórmen, che l’à vedù che al ge tol al fen, l’averc chest podarel, e l l’à trat sù te mez chest tórmen. E chest cortel no l’é più vegnù jù. Ma l fen l’é sin jit. E dapò l’à vardà olache che l va chest fen e l’é jit via via per bosch da Roe e fora par Aloch e l ge é jit dò.  Candenó da sera o l’indoman, l’é ruà un. L disc:  – «Té l disc, te porte to cortel l disc, tu me as ben fat na bela fatura l disc: no veiste l disc olache tu me as tocà? l disc Tu me as tocà l disc te n’eie!»  – «Tu l disc no t’as da passar l disc col tórmen via per l prà l disc. Tu tu me lasce star l fen!»