E chela de la spies la saede? N’outa crescea l gran jù e jù fin japede. Insoma l’era abondanza de pan, duc durèa pan; oh, come ades. I lo trèa stroz e insoma i no fajea nesciun cajo del pan. E l Signoredio l se à inirà e l disc: «Ah ben, a sta jent no ge lasce più crescer nia!» E la Madona, che la é semper stata chela che à intercedù per nos: «Na na, la disc, nia più, na! Chel che tegn mia man, lascià crescer gran» (perché vedede ben, la spies l’é na man) «e l’auter, stram». Bon. Insoma l’é vegnù d’uton. Jà d’ìstà i vedea: «Ma che roba, co sarèla?» D’uton, cari, l’era sta picola spia e nia de auter. Oh, i à seslà, i à scomenzà a tegnir cont de la roba; insoma l’era pech, noe, capirede…  I strapacèa massa l pan, e i no tegnìa cont del pan, de la grazia de Dio, come che i dijea chi egn! Chi egn i dijea che l Signoredio l’é vegnù jù del musciat per na schiufa de na fèa, per ne insegnèr che se con tegnir cont. Dapò ence te ciamp, canche l’era che se seslèa, se dijea ai bec: «Jì a coer sù la spies, dapò canche fajon pan ve fajon na bela pinza, noe». Dapò canche i fajea pan i ge fajea a chisc bec na bela pinza grana, e i ge metea ite ua passes e dapò i ge la dajea, percheche i aea coet sù la spies. Ah, chi egn i tegnìa pa cont, vedé, de la roba. Auter che ades! NB: Nella trascrizione si omette il frequente intercalare “l disc / la disc” che caratterizza il discorso diretto e i dialoghi della narrazione popolare