Chi egn, canche i aea la jent su per chisc pré che i ge didèa seèr e trèr jù fegn o coscita, la vea de Nadèl i li invièa a cena. Ma sicome la vea de Nadèl no se podea magnèr da cèrn, i fajea la jufa: te na gran fana i metea ite lat e farina, dapò i metea smauz sora via. Dapò i fajea menudoi: i fajea n sfoi de pèsta sun panarel, e dapò i li taèa sù picoi picoi e dapò i li chejea, e dapò i metea jù smauz e magari poìna o coscita; i ge dijea menudoi. Dapò i invièa chi che era stat d’istà su per pra a ge didèr lurèr. E i fajea chesta cena, in vea de Nadèl.  Dapò inveze da Pèsca Tofègna, canche l’era dai Trei Re, i invièa chi che cognea jir chel an a ge didèr su per i pré. Ma inlouta i fajea più gran, perché da Pèsca Tofègna no l’era astinenza. Inlouta i chejea cèrn de porcel, che i n’aea quasi duc; dapò i fajea fortaes, e i fajea magari grafons. I fajea na gran cena; i ge dijea «la Gran Cena». E dapò, dò cena, i se tolea na pegnata con mingol de èga sènta e l patron de cèsa con un bez l jìa tras intorn cèsa, te stua, ju per cèvena e su per tobià e daperdut, a benedir co l’èga sènta, e dapò i dijea paternòstres. Eco, chest l’era da Pèsca Tofègna.  Dapò, dant de Pèsca Tofègna i vestìa sù trei bec da Re Magi, i ge dijea: i ge fajea na capa de carton, e i ge dajea un bel fazolet e i li vestìa sù mingol belebon, e i li manèa fora per sta cèses a ciantèr la cianzons dei Re Magi. E dapò i se ciapèa dotrei scioldi, èi èi. E duc i era contenc che ruèa i Re Magi e i dijea: «Oh, rua i Re Magi, oh che bel!»  Ma, oh, no i cherdea, insoma, i dijea n’outa…  i dijea n’outa che un on l’era jit te stala; i dijea che la vaces pèrla la sera de Pèsca Tofègna. Robes da nia. E un on, che l’era più corgious, l’à dit che l va te stala a scutèr che che les se disc la vaces. Pò l’é jit ite, l se à sentà jù e, e bon. Canche i é jic ite da doman l’era mort, i dijea.  Ma, no se podea, ma... Chestes l’é fantasìes de chi veges da chi egn. Ah, a ve preèr, no l’é vera no!