N bregostan e l’agnol neigher

Scutà na contìa de Tita de Megna.
Dessot i cougoi, tinsom pian de Schiavaneisc l’era na pìcola utria ló che stajea n om e na femena che i aea doi pìcioi. I era amò salvèresc e nience batesé desche i bregostegn da n’outa. Jent jaghea che de net i era bogn de se fèr invijiboi e i vegnìa tel paìsc de Cianacei a robèr da magnèr, guanc e scioldi. Nesciugn era bogn de i spièr perché sotemanvìa duc aea paura e sin vardèa. Na dì al bregostan g’é dat l bot e l’é mort. Chi doi bec che no i à mai vedù morc no i saea co se la tor. No parlon de sia mère che no la saea che spil peèr a man. Fora de nia ge à parù che se aure la fonestra de stua e vegne ite n pìcol om neigher con doi pìcoi corgn sul cef e doi ales neigres ence cheles desche ciarbon. Chest om neigher l graza mingol intorn la letiera e se tol l mort su la spales e fora per fonestra e su su per Sas da Pordoi sgolan. Trei dis dò rua te Pian de Schiavaneisc n om che jìa a baranchies. I doi bec i é jic encontra e i ge à dat a capir che so père l’é mort e n om neigher da ales l l’à portà sun Sas da Pordoi a soreie. Chest om sperdù e spaentà l’à petà aló dut e ju a Cianacei a ge dir al preve. Chest l’à capì de chel che se trata, l se à tout la stola, l liber da la benediscions, l’èga sènta e n pìcol Signoredio e ite te Schiavaneisc. L preve, che l’aea inom don Battista, l se n’aea inajumà che vita che fajea chisc doi peres salvèresc e l ge à dit bel co la bones: «se no volede che chel om neigher, che l’é l diaol, vegne a ve tor ence a vo canche manco cherdede, cognede lascèr de jir a robèr a la jent, e fajeve cristièna e fajé batejèr vesc pìcioi.» Dapò l’à tout fora l Signoredio e l ge à dit che l’é mort su la crousc per nos e per duc e che ge vel domanèr perdonanza e prometer de mudèr vita. Chela pera cossa l’à emprometù de fèr dut chel che l preve dijea. «Ve dae chest pìcol Signoredio», disc amò don Battista, «che l’é benedì, portalo semper intorn al col e l diaol no poderà ve fèr nesciun mèl. Per i vesc pìcioi no abià brea de ve cruzièr, tra l Signoredio e la bona jent, provedaron per ic, per l’èmena e per l corp. Ma l mèl che aede fat l’é gran e cognede fèr chesta penitenza: per doi meisc a la lengia indèna messa grana e besper cognede stèr injenegèda sote l teac de gejia fora Ciampedel co na gherlanda de stram sul cef e a ognun che va te gejia cognede ge preèr perdonanza, e dapò per restituir chel che aede robà cognede didèr fora la jent col lurèr per ic demò per la speisa zenza paament. Olache jide a lurèr i ve dèsc pa ben vèlch da magnèr e canche no aede lurier, jì a ve l preèr che duc ve n darà. L preve, dò de ge aer dat la benediscion co l’èga sènta l ge à lascià la corona e l crozefisc da tachèr sù te stua. Sta pera cossa co la lègremes che ge dajea jabas l’à prometù de mudèr vita e l’à rengrazià l preve.
Dotrei dis dò fiol caro, la utria l’à ciapà fech e l’à abù ora a sciampèr fora. Bon che i pìcioi no i era aló. Intant che dut ardea, sprizèa fora de burc giac neigres con eies de bolifa e l pel su dret che sbolifèa fech. Ma no l’aea paura perché la tegnìa la corona te man e l crozefisc entorn al col. No i podea fèr auter che passan en furia enlengia ela via, dèr na gran schiancolèda e demez. Te l’afèr de n chèrt d’ora de la baraca no l’é restà auter che l cender e la é se n vegnuda ju a Cianacei e la s’à enjenegià de fora da rejia de gejia de Sèn Forgian co la corona te man e a ognun, om e femena che vegnìa a jir te gejia la ge preèa perdonanza. Na femena de gran ciarità ge à dat alberch e coscita l’à podù stèr te paisc e viver sche i etres.
Chesta contìa la é veia e veiora e l’é la recordanza de canche te Fascia l’era amò i salvèresc che no i era cristiegn e i vivea ti bosć e inveze tei paìjes stajea jent cristièna vegnuda fosc da sapa olè. I salvèresc aea paura dei cristiegn e chisc de i salvèresc perché i cherdea che i fossa del diaol o amancol didé da el. Ma n pech a l’outa o per na desgrazia o per auter i se à cognosciù, i é doventé cristiegn ence i salvèresc, i é vegnui a stèr te paìsc e coscita i se à mescedà co i etres. Ma chisc fac i é pa sozedui da ca a mille e passa vedé.

N bregostan e l’agnol neigher

Scutà na contìa de Tita de Megna.
Dessot i cougoi, tinsom pian de Schiavaneisc l’era na pìcola utria ló che stajea n om e na femena che i aea doi pìcioi. I era amò salvèresc e nience batesé desche i bregostegn da n’outa. Jent jaghea che de net i era bogn de se fèr invijiboi e i vegnìa tel paìsc de Cianacei a robèr da magnèr, guanc e scioldi. Nesciugn era bogn de i spièr perché sotemanvìa duc aea paura e sin vardèa. Na dì al bregostan g’é dat l bot e l’é mort. Chi doi bec che no i à mai vedù morc no i saea co se la tor. No parlon de sia mère che no la saea che spil peèr a man. Fora de nia ge à parù che se aure la fonestra de stua e vegne ite n pìcol om neigher con doi pìcoi corgn sul cef e doi ales neigres ence cheles desche ciarbon. Chest om neigher l graza mingol intorn la letiera e se tol l mort su la spales e fora per fonestra e su su per Sas da Pordoi sgolan. Trei dis dò rua te Pian de Schiavaneisc n om che jìa a baranchies. I doi bec i é jic encontra e i ge à dat a capir che so père l’é mort e n om neigher da ales l l’à portà sun Sas da Pordoi a soreie. Chest om sperdù e spaentà l’à petà aló dut e ju a Cianacei a ge dir al preve. Chest l’à capì de chel che se trata, l se à tout la stola, l liber da la benediscions, l’èga sènta e n pìcol Signoredio e ite te Schiavaneisc. L preve, che l’aea inom don Battista, l se n’aea inajumà che vita che fajea chisc doi peres salvèresc e l ge à dit bel co la bones: «se no volede che chel om neigher, che l’é l diaol, vegne a ve tor ence a vo canche manco cherdede, cognede lascèr de jir a robèr a la jent, e fajeve cristièna e fajé batejèr vesc pìcioi.» Dapò l’à tout fora l Signoredio e l ge à dit che l’é mort su la crousc per nos e per duc e che ge vel domanèr perdonanza e prometer de mudèr vita. Chela pera cossa l’à emprometù de fèr dut chel che l preve dijea. «Ve dae chest pìcol Signoredio», disc amò don Battista, «che l’é benedì, portalo semper intorn al col e l diaol no poderà ve fèr nesciun mèl. Per i vesc pìcioi no abià brea de ve cruzièr, tra l Signoredio e la bona jent, provedaron per ic, per l’èmena e per l corp. Ma l mèl che aede fat l’é gran e cognede fèr chesta penitenza: per doi meisc a la lengia indèna messa grana e besper cognede stèr injenegèda sote l teac de gejia fora Ciampedel co na gherlanda de stram sul cef e a ognun che va te gejia cognede ge preèr perdonanza, e dapò per restituir chel che aede robà cognede didèr fora la jent col lurèr per ic demò per la speisa zenza paament. Olache jide a lurèr i ve dèsc pa ben vèlch da magnèr e canche no aede lurier, jì a ve l preèr che duc ve n darà. L preve, dò de ge aer dat la benediscion co l’èga sènta l ge à lascià la corona e l crozefisc da tachèr sù te stua. Sta pera cossa co la lègremes che ge dajea jabas l’à prometù de mudèr vita e l’à rengrazià l preve.
Dotrei dis dò fiol caro, la utria l’à ciapà fech e l’à abù ora a sciampèr fora. Bon che i pìcioi no i era aló. Intant che dut ardea, sprizèa fora de burc giac neigres con eies de bolifa e l pel su dret che sbolifèa fech. Ma no l’aea paura perché la tegnìa la corona te man e l crozefisc entorn al col. No i podea fèr auter che passan en furia enlengia ela via, dèr na gran schiancolèda e demez. Te l’afèr de n chèrt d’ora de la baraca no l’é restà auter che l cender e la é se n vegnuda ju a Cianacei e la s’à enjenegià de fora da rejia de gejia de Sèn Forgian co la corona te man e a ognun, om e femena che vegnìa a jir te gejia la ge preèa perdonanza. Na femena de gran ciarità ge à dat alberch e coscita l’à podù stèr te paisc e viver sche i etres.
Chesta contìa la é veia e veiora e l’é la recordanza de canche te Fascia l’era amò i salvèresc che no i era cristiegn e i vivea ti bosć e inveze tei paìjes stajea jent cristièna vegnuda fosc da sapa olè. I salvèresc aea paura dei cristiegn e chisc de i salvèresc perché i cherdea che i fossa del diaol o amancol didé da el. Ma n pech a l’outa o per na desgrazia o per auter i se à cognosciù, i é doventé cristiegn ence i salvèresc, i é vegnui a stèr te paìsc e coscita i se à mescedà co i etres. Ma chisc fac i é pa sozedui da ca a mille e passa vedé.